بختك اليوم .. وأنت والهموم
على غير عادتى .. ولكن بسبب الفراغ الذى أعيشه بعض الوقت وليس أمامى سوى ورقات الجرائد التى أكره قراءتها .. وبكل غباء - وأعرف انى كنت غبيا فى تلك اللحظة – قررت ان اتصفح جريدة الأخبار القومية المملة جدا والتى لا تنفع لكنها ربما أحيانا تضر .. (لأن اللى يقرأ الجرايد القومية او جرائد المعارضة بسهولة جدا يجيله ضغط او سكر واهو حتى يوفر ف سكر البيت شوية) ..
وقعت عيناي على حظك اليوم .. ماشي يا سيدى تعالى نشوف حظنا الـــ ........ عامل ايه ؟؟
لا تسافر اليوم فسوف تنشق الأرض وهتبلعك يا عمرو ..
يا نهار ابيض !! ده بيقول يا عمرو !! .. لالالالالالا اكيد يقصد حد غيرى .. هو مفيش عمرو غيرى فى البلد دى ولا ايه ؟؟ .. لا اعلم كيف صار خطل الأبراج علما وأصبح له علماء .. والله عااااااال .. تعالوا بقى نشوف صفات برج (الجردل) قصدى الدلـو :
طيب لكنه شرير .. وذو طابع هادئ جدا لكنه متسرع .. صاحب بشرة بيضاء لكن قلبه أسود وكمان بشرته سودة .. طويل ورفيع .. طخين وقصير .. بياكل لما بيجوع .. وبيشرب لما بيعطش .. اللى بيقعد ع قهوة النجارين كتير .. شفيق ياااااااااا راجل ..
ولا تتعجب لو بنوتة امورة كده فسخت خطوبتها .. تقولك اصلى برج القطة مبيمشيش مع برج الكلب .. ولا تتعجب ايضا لو لاقيت واحد صاحبك بيقولك أنا خلاص بقيت أنام بدرى .. ليه يا بنى ؟؟ أصلى أنا برج العقرب .. والعقرب برج نهارى وبيخاف م الضلمة .. أحسن هيطلعلوا عفريت ..
المشكلة بقى انى انا مبقتش عارف انا تبع أنهى برج ؟؟ .. برج العقرب ولا برج العذراء ولا برج الدلو ولا برج القاهرة ؟؟ مش عارف ..
كل ما أقرأ صفات كل برج ألاقينى فيه .. يا نهااااااااااااار أبيض ؟؟ .. أنا كده اتسجلت غلط .. يعنى (مسجل خطر) !؟ يااااااارب استر ..
طيب بلاها برج الدلو .. تعالى نشوف برج الجوزاء : رزق وفير يأتى لك من السماء اليوم ..
فقد قرأها شخص عراقى برج الجوزاء وأتاه صاروخ دمر بيته فى ذلك اليوم .. وقرأها شخص مصرى جوزاء واترفد من الشغل .. وقرأها فلسطينى جوزاء أيضا وتلقى رصاصة فى قلبه وفارق زوجته .. وقرأها لاعب الكرة رونالدو جوزاء وراح ريال مدريد .. وقرأها أوباما جوزاء وتولى حكم أمريكا .. وانا كمان قرأتها ونفسي غمت عليا وضغطى ارتفع ..
مش قلتلكم الجرايد بتعلى الضغط والسكر .. هى ناقصة كمان أبراج !!
