أحوال القلوب (5) ..!

وقفة مع القلب

.

.

.

إلى ما بعد رمضان

.

.

.

أحوال القلوب (4) ..!

قال بن القيم رحمه الله : (لـَمَّا كان للقلب قوتان : قوة العلم والتمييز .. وقوة الإرادة والحب .. كان كماله وصلاحه باستعمال هاتين القوتين فيما ينفعه , ويعود عليه بصلاحه وسعادته) .. انتهى كلام بن القيم رحمه الله ..




انا أحب بن القيم .. ومن وجهة نظرى الضيقة لا أرى مثيل له فيمن تكلم عن القلب ..فهو افضل من تكلم عن القلوب ..




القلب له قوتان (مفيش تالت) ..

قوة العلم وتكمن فى العقل ..

وقوة الحب وتكمن فى الاحساس ..




لو انت عندك قوة .. يبقى أفضل استغلال ليها هو تقويم قوتك بالكامل .. كذلك القلب ..

أفضل قلب هو اللى يقدر يستغل قوته كلها ..




القلب ممكن يميز الشئ ده بعقله .. ويدرك ان الشئ ده هو الصواب والافضل .. لكن يتبقى الجانب التاني اللى هو الاحساس .. أو مدى ميل القلب للشئ ده ..



ممكن (عقل قلبك) يقولك ان الشئ ده صح لكن (احساس قلبك) مش متقبله ..



كده يبقى القلب سقط منه (نصفه)


بمعنى ؟؟


انه القلب عرف الحق ومعرفة الحق بالعقل .. لكن على الجانب الاخر .. القلب أنكر الحق باحساسه وهواه ..

:: مثال بسيط ::

قال تعالى " صراط الذين أنعمت عليهم غير المغضوب عليهم ولا الضالين"




الله سبحانه وتعالى أخص النصارى بالضلال .. لأنهم أمة جهل ..


وأخص اليهود بالغضب .. لأنهم أمة عناد ..



فالنصارى لم يعرفوا الحق ولم يدركوه بعقولهم (ان كان لهم عقل) .. حتى انهم لم يشعروا به ولم يحسوه ..



أما اليهود فقد عرفوا الحق وادركوه بعلمهم .. لكنهم كرهوا ما انزل الله اليهم وانكروه باحساسهم (ان كان لهم احساس)..

فالنصارى عبدوا بغير علم .. واليهود عرفوا الحق وزاغوا عنه ..





فممكن القلب يحب شئ مش سليم .. وده القلب الاهوج .. بيمشي ورا هواه .. مش عاوز يفكر .. مكسل يبحث عن الحقيقة ..

يبقى القلب ده جاااااااااااااهل

اما القلب اللى بيفكر صح وبيبحث عن اللى يفيده فى حياته .. لكن حين وصوله للحق يحاول ان يبعد عنه علشان هو تقيل عليه .. ومش حابب الشئ ده ..

يبقى قلب مغضوب عليه لأنه انكر الحق ..

تعالوا بقى نفكر ..

لو القلب ده استخدم القوتان الخاصين به مع بعض.. ممكن يوصل لايه ؟؟

يعنى لو القلب عرف الحق قدر المعرفة .. وادرك ان الشئ ده فيه فلاحه ونجاحه .. وده من جانب العقل

وعلى الجانب الأخر .. أحب الشئ ده وبيعمله وهو راضي عن الشئ ده وبيتلذذ من اداؤه .. وده من جانب الاحساس ..

أكيد القلب ده .. قلب أنعم الله عليه .. قلب كامل الاستعمال ..

:: كلمة أخيرة ::

من لم يعرف الحق فهو جاهل ضال ..
ومن عرفه وآثر غيره عليه فهو مغضوب عليه ..
ومن عرفه واتبعه فهو من الذين أنعم الله عليهم ..

:
:
:
فتش عن قلبك ..

شوف انت مين فيهم ؟!
:
:
:

أحوال القلوب (3) ..!

طبعا كلنا احيانا بيكون عندنا وقت فراغ .. وبنبقى محتارين نقضيه فى ايه ؟؟

الفراغ دايما شئ مزعج بطبيعته ..

كمان القلب له وقت فراغ ..

هنقول (فراغ القلب أو الفراغ العاطفي)

يعنى ايه فراغ عاطفى ؟؟

فراغ يعنى شئ فاضى .. والعاطفة معروفة ..

بمعنى انك عندك طاقة عاطفية ومشاعر جياشة مش عارف تقضيها فين ؟؟

عندك وقت فاضى كتير جدا .. بتبحث فيه عن وقت مناسب علشان تفجر فيه الطاقة دى ..

لكن المشكلة مش فى الوقت .. المشكلة فى الشئ اللى هيستوعب الطاقة دى ..

كلام لوغاريتمات .. صح ؟؟

هنبسطها شوية ..

يعنى انت مش لاقى حد تحبه .. وعندك شحنة عاطفية مش عارف توديها فين او توديها لمين ..؟؟

ودى بالنسبة للقلب مشكلة عويصة جدا جدا ..

يبدا القلب يدور .. يدور ..

عارفين القلب عاوز يوصل لايه ؟؟

عاوز يوصل للاهتمام ..

القلب عاوز يلاقى حد يهتم بيه .. يسأل عليه ..

كنت فين ؟؟

انت وحشتنى

القلب عاوز واحد يحسسه انه مش شايف غيره فى الدنيا دى

بينام علشان يحلم بيه .. ويصحى علشان يفكر فيه ..

المشكلة بقى انه بيبحث عن قلب اخر مش مهم يكون مناسب او لا ..

المهم انه يكون فى سد خانة وخلاص .. المهم انه يخرج المشاعر دى فى اى مكان حتى ولو فى صندوق زبالة (عذرا) ..

واحد مثلا يروح يحاول يحب واحدة .. مش علشان هى حلوة او فيها حاجة كويسة .. لالالالالالالا .. مش مهم

المهم انه يخرج الاحاسيس اللى عنده ..

انت لما بيكون عندك طاقة فنية .. بتروح ترسم مثلا .. ده شئ جميل .. لكن هترسم ايه ؟؟

هترسم صورة مخجلة للنظر ولا صورة من الطبيعة الخلابة .. ؟؟

كذلك طاقة القلب ..

عندك مشاعر عاوز توظفها .. مفيش مانع ..

لكن وظفها صح ..

حطها فى المكان السليم ..

اذا كنت متزوج ومن الله عليك بالزواج .. فرغ الشحنة دى مع زوجتك ..

واذا كنت زى حالاتى .. حاول تحطها فى المكان السليم ..

:

:

:
:

:

فكر شوية فى عبادة ربنا

..

أحوال القلوب (2) ..!

المرة دى انا هاتكلم عن (القلب) مش هو اللى هيتكلم عن نفسه ..

انا هاغتابه شوية وهاتكلم عليه من وراه .. سامحنى بقى يارب

القلب ده عضو غريب فعلا زى ما قال على نفسه فى الكلام السابق ..

هنتكلم دلوقتى عن علاقة القلب بالفتن (القلب المفتون) .

القلب ده عبارة عن (جهاز اختبار Test ) يعنى ايه بقى ؟؟

بص يا سيدى :

القلب ده عبارة عن جهاز ومحاط بغلاف عازل (المناعة) .. خليك معايا ..

طبعا عندنا نوعان من الفتن (وخدوا بالكم من الكلمتين دول كويس قوي) :

- فتنة الشهوات
- فتنة الشبهات

القلب هيمر عليه سهم مسموم (فتنة) .. أول ما يقرب .. تبدأ المناعة تستكشف السهم ده وتشوف ايه اخباره ..

السهم ده عبارة عن فتنة شهوة او فتنة شبهة ..

طبعا فتنة الشهوة زى نزوات الانسان للجنس الاخر او شهوة المال او شهوة التكبر او شهوة الاكل والشرب ..

وفتنة الشهوة بتبقى فتنة ظاهرة وواضحة وهى امر خطير وكثير ..

اما فتنة الشبهات فهى اكبر خطر على القلب ..

مناعة القلب بتبقى عاجزة عن معرفة نوع الفتنة دى ايه .. وهل هى حرام ام حلال ..

قولنا ان السهم رايح للقلب .. تبدأ المناعة تفرز أقوى حماية عندها وتقاوم على قدر الإمكان .. واخيرا والحمد لله انتصرت مناعة القلب على السهم (الفتنة) .

وهكذا تانى سهم وثالث سهم والرابع والخامس ...

وبالشكل ده يفضل القلب بصحته تمام قوى ..

قلب قوى جدا

قلب عنده حصانة من حديد

وذلك قوله تعالى "إلا من أتى الله بقلب سليم"

قلب سليم صحيح مفيش فيه خدش ..


نرجع ونكمل تاني ..

سهم قوى جدا .. جاى بسرعة عالية .. وهكذا .. تقوم مناعة القلب للصد عن القلب لعدم اختراق السهم (الفتنة) .. لكن المرة دى السهم (الفتنة) كان أقوى من القلب .. وقدر يصيب القلب .. بدأ القلب ينزف ..

سهم تاني .. اخترق .. بدا القلب يضعف ..

سهم تالت .. القلب وقف بصمود .. وقدر يصد السهم والحمد لله قدر يمنع السهم (الفتنة)

سهم رابع .. أخترق .. بدأ القلب يضعف أكتر ..

سهم خامس وسادس وسابع وووووووووووو

شوية القلب يصد سهم وسهم تانى يخترق .. سهم يخترق وسهم يتصد .. سهم يخترق وسهم يتصد ..

القلب تعب قوى ..

القلب بقى ضعيف

القلب بقى مريض ..

وذلك قوله تعالى "فى قلوبهم مرض"

القلب تعبان ومريض .. عاوز يتعالج ..

لازم يتعالج .. لأن حالته متأخرة جدا .. واحتمال ينتهى ..

فجأة .. القلب يقوم بحالة طوارئ سريعة ..

ويقوم بتنشيط أنتى فيروس مضاد للسهام المسمومة (الفتن)

وبقوة .. يحاول القلب تعديل معظم الجراحات ووقف النزيف قدر الإمكان ..

طبعا نوع الانتى فيروس معروف (الرجوع والانابة لله والندم على ما فات والاستغفار والتوبة)

وده نوع من القلب اللى كان مريض وربنا عالجه وشفاه ..

فى نوع تاني بقى ..

هو قلب مريض .. لكن كان ممنوع من بعض انواع من الأكل ومع ذلك كان بياكل الممنوع (الحرام) .. ومكنش بياخد الدواء ..

وكل مرة سهم يدخل وتانى يدخل وتالت ورابع والف سهم (فتنة) .. وهو مش حاسس بيه ..

مبقاش عنده مناعة .. المناعة أصبحت تحت الصفر .. كل السهام (الفتن) اللى تجيله يبلعها .

وجهاز الاختبار مبقاش قادر يفرق بين معروف او منكر او بين سهم او أنتى فيروس ..

كله بقى عنده واحد .. مبقاش عارف حلال من حرام ..

مش عارف يحدد من كتر السهام .. والمناعة انعدمت ..

علشان كده :

للأسف القلب مات ..

أحوال القلوب (1) ..!

السلام عليكم ورحمة الله وبركاته .. ازيك يا عمرو .. أخبارك ايه ؟؟

متخفش مش هأخرك كتير عارف انك مستعجل بس أنا عاوز بس أفضفضلك بشوية كلام كده على قدى ..

أنا قعدت أسأل وابحث كتير علشان اعرف انا ايه ومين بالظبط ..

وعرفت كمان الحمد لله هما سمونى كده ليه ؟؟

هما سمونى كده لانى متقلب بطريقة سريعة جدا
يعنى ممكن اكون أسعد واحد فى الكون وف لحظة ابقى اتعس واحد فى الكون
ممكن اكون كسلان وفجاة ابقى نشيط
وممكن اكون متفائل وشوية متشائم
وشوية قريب من ربنا وشوية بعيد
وساعات ابقى مريض وساعات ابقى سليم
وساعات اكون صريح وساعات اكون غامض
وساعات اكون ابيض وساعات اكون الوان وساعات اكون اسود
وساعات اكون منور وساعات مضلم
وساعات اكون بارد وساعات اكون نار
وساعات انبض بسرعة وساعات امشي بطئ
لكن الحاجة الوحيدة اللى مقدرش اعملها هى انى اقف لأنى لو وقفت أموت فورا علشان كده سمونى (القلب) ..

عمرو : يا عم خلصنى انت هتحكى قصة حياتك ..؟؟!!

والله انا بستغرب على حالى ده .. على فكرة احب أقولك على حاجة مهمة .. الناس مفكرة ان المشاعر والاحاسيس بتخرج منى .. هى فعلا كده لكن برضه العقل موجود جوايا يعنى العقل والمشاعر عندى واللى يقولك ان العقل فى المخ ده يبقى عبيط واهبل ومبيفهمش حاجة ..

ربنا خلقنى كده .. متقلب ... ممكن ازعل من شخص ف لحظة وممكن أحبه بكلمة وممكن أقرب من شخص وفجأة اسيبه وممكن أشوف واحد من أول مرة مرتحلهوش ..

كمان فى حاجة غريبة جدا بتحصلى .. ممكن أشوف واحدة أحبها من أول مرة رغم ان معنديش عين .. وممكن كمان هى تحبنى بالرغم ان مفيش بينى وبينها صلة تخاطب ..

وكمان ممكن اسمع الأذان وحى على الصلاة اتنفض واروح لبلاد بعيدة جميلة .. بلاد ربانية ..

ورغم انى عارف الخطأ هو الاصرار على الخطأ وبرضه بعمله ومصر عليه .. وكمان عارف انى بندم ندم شديد جدا بعد ما ارتكب ذنب ورغم كده بكرر الذنب كتير ..

عمرو : يا عم أنت عاوز ايه بالظبط ؟؟

والله يا عمرو أنا بس بحبك وارتحتلك لله فى لله وبدون أى مصلحة وعاوز افضفضلك ..

عمرو : قول يا سيدى .. اشجينا .. صدعنا صوتك ..

عموما انا هاستحمل تريقتك لانى مش لاقى حد غيرك أفضفضله والا والله ما كنت عبرتك ..

عمرو : انت هاطول لسانك كمان ؟؟!!

ياعم عمرو هو انا لي لسان أصلا .. المهم اسمعنى بس ..

انا بجد نفسي ارسى على بر .. وياريت يكون بر أمان ..

يعنى أنا بحب أسمع اغانى بس بحاول ابعد عنها وبعدت عنها فعلا كام شهر لكن مقدرتش .. مش عارف ليه انا عاجز كده ؟؟

وكمان ساعات احب الشهرة وف نفس الوقت محبش كل العيون تبقى عليا .. وبحس انى متناقض شوية او انانى وف نفس الوقت ساعات بكون طيب قوى ومكسور ..

أنا عاوز اقولك كلام كتير بس مش عارف أعبرلك .. يعنى مثلا أحساسى قبل ما أعمل ذنب ببقى نشيط جدا والشيطان ابن الملعون شغال على نار وتحس انى هاعمل المستحيل علشان اعمل الذنب ده يمكن ارتاح ونارى تهدى شوية .. وربنا يصعب عليا الذنب ده ..

ساعتها بس بحس ان ربنا بيحبنى ورايد لى الخير .. يعنى مثلا لو انا ماشى فى الطريق وشفت واحدة استايل شوية (رغم انى مليش عيون اشوف بيها) فجأة تلاقى اوتوبيس طويل عريض يعمل حاجب بينى وبينها ومعرفش اشوفها .. او مثلا وانا متضايق من واحد وخلاص ممكن أثور عليه واحدفه بكام كلمة وشتيمة وفجأة ألاقى راجل محترم وطيب بيهدينى فاخجل منه واسكت .. يبقى كده ربنا بيحبنى ..

والا بقى فى الخلوة .. يااااااااااااااااااااه أعوذ بالله منها .. أصعب شئ بجد .. نصيحة منى يا عمرو أوعى تفكر فى الخلوة أبدا وان كانت حتما ولابد عليك حاول انك تستغلها صح .. يعنى مثلا أقرأ كتاب او امسك المصحف او اخرج فورا قابل اى حد من اصدقائك ..

لكن المشكلة بقى بعد وقوع الذنب .. انا ببقى ضعيف جدا ومريض وندمان جدا لكن يمكن مينفعش الندم ..

هاحكيلك بقى شوية على واحدة بحبها من اول نظرة ..

عمرو : يووووووووه انت مش هتخلص النهاردة ولا ايه ؟؟

اسمعنى بس .. انت عارف انا اول ما شفتها بقيت مجنون بيها .. بس خايف احسن تكون بتحب حد تاني .. وخوفى اكتر لو اتجوزت غيرى .. نفسى اتقدملها ف اقرب وقت لكن انا لسه فى الكلية .. طب اعمل ايه ؟؟

نفسي اصرح لها بحبى .. بس ف نفس الوقت خايف من ربنا ولازم ادخل البيت من بابه ..

والا مشكلتى مع اصحابى .. دى مشكلتها مشكلة ...

ساعات اكون حابب انى اخبى عليهم حاجة لكن مبقدرش .. تلاقى الكلام خارج منى على اللسان على طول .. وساعات اكون غامض معاهم فى شئ لكن هم بيفهمونى بسرعة رغم انى بلف وادور كتير علشان ادارى لكن هم بيوصلوا للشئ غصب عنى بحكم عشرة السنين اللى بينا ..

والا بقى لما اكون شايل من حد .. ساعات ابقى اسود بلاك .. وساعات اكون ابيض متسامح .. وساعات ملون .. يعنى حبة كده وحبة كده على شوية لوع ودلع وتقميص ..

ودايما الناس تظلمنى وتقول عليا كلام وحش .. طب انا ذنبى ايه إذا كان الشخص نفسه مش كويس ؟؟!!

مش عارف والله يا عمرو اقولك ايه ولا ايه ؟؟

متحكيلى انت بقى يا عم ؟؟ وقولى اخبار قلبك ايه ؟؟؟؟

.

.

.

.

بـورتـريـه (قصة قصيرة) ..!

فى حجرتي التى تعلو سطح عمارة فاخرة وسكانها أصحاب النفوذ والاملاك والسيارات الفارهة .. والتى تتكون من أربعة جدران بالطوب والطين ويعلوها سقف من القش, ومع ألواحي وريشتي وعلى ضوء الشموع, فأنا لا أمتلك مالاً لأدفع فاتورة الكهرباء ولا أمتلك من المواهب إلا يد تتحرك يمنة ويسرة وأعلى وأسفل حتى أُفاجأ أنها رسمت صورة زيتية غاية فى الجمال ..

- تك تك تك ..

- مين ؟؟؟

- افتح .. أنا فاخر بيه

فتحت الباب .. نظر لي باشمئزاز وقال متعجرفا وأنفه فى السماء وفمه مقلوب سخطاً على حالي .. فهو صاحب المال والجاه وأنا ذو الثياب المرقعة والشعر المنكوش.

فاخر بيه : انت رسام ؟؟؟ عال عال .. أنا عاوزك ترسم لي بورتريه من وحي خيالك ..

- حاضر يا فندم .. تحب أجيبهالك إمتى ..

فاخر بيه : لالالالالالا ... أنا هاعدى عليك علشان ميصحش تجيلي المعرض بمنظرك ده .. أو إلبس حاجة نضيفة وأنت جاي .. مفهوم ؟؟

- حاضر يا فندم .. طب ممكن حضرتك ........

وقبل أن أكمل كلامي .. رأى "فاخر بيه" فى عيني نظرة شغف للمال .. مد يده فى جيبه وأعطاني مبلغ لا بأس به ..

أنا لا أحب رسم البورتريه .. لكن الحاجة للمال تغير المزاج وتغير المبادئ وربما تغير قوانين الكون .. رسمتها .. فتاة لم أرى أجمل منها على وجه الارض .. أخذ "فاخر بيه" البورترية وقال لى "عدي عليا بكرة" .

وفي الطريق أحلم بالمال بل ان تخيلاتي اكبر بكثير من هذا .. سوف يعرض فني فى معارض رجال الاعمال بدلا من الحجرة الضيقة البائسة .. جئته في الموعد المحدد .. دخلت المعرض .. أشار علىّ "فاخر" وهو يحدث شخصا أخر (هو ده اللى رسمها) ..

إستقبلنى الاخر (تعالى معايا) .. ركبت معه السيارة "الجاكوار" وضع البورتريه فى الكرسي الخلفي .. وسار مسافة ثم توقف فجأة .. ونظر إليّ سائلا (رسمت صاحبة الصورة دى فين؟؟) – قلت مبتسما (دى من وحي خيالى) .. فجأة أشتد غيظه وأخرج من جانبه مسدسا ووضعه فى مفرق رأسي (هاتقول رسمتها فين ولا أقتلك وتترمي زي الكلاب) لم اتمالك أعصابي ورفعت يدي وهما يرتجفان من شدة الهلع (والله رسمتها من خيالي).

أخبرني أنها زوجته .. نزل عليا الخبر كالصاعقة .. كنت مندهشا .. كيف تكون زوجته وأنا قد رسمتها من خيالى؟؟ .. هل يتوافق الخيال مع الحقيقة إلى هذا الحد؟! ..

أمسك بالبورتريه ومزقه .. واستراح هادءا على كرسيه ثم قال وهو ينظر لي نظرة تهديد ووعيد (أتمنى أنها تكون اخر صورة ليها عندك) .

سأعود إليكِ يا حجرتي ..
.
.
.
.

.

كلمات من ذهب ..!

قال رسول الله – صلى الله عليه وسلم:



( المؤمن القوي خير وأحب إلى الله من المؤمن الضعيف . وفي كل خير . احرص على ما ينفعك واستعن بالله . ولا تعجز . وإن أصابك شيء فلا تقل : لو أني فعلت كان كذا وكذا . ولكن قل : قدر الله . وما شاء فعل . فإن لو تفتح عمل الشيطان ) رواه مسلم فى صحيحه

الله .. ما أجمل هذه الكلمات العذبة !!




كلمات لا تحتاج إلى تفسير


..كلمات سلسة وماتعة ويسيرة يرق لها القلب ..



اللهم صل وسلم على حبيبنا وحبيبك المصطفى

-صلى الله عليه وسلم-




الذى أنار لنا الطريق




ولم يترك لنا خيراً إلا ودلنا عليه



ولم يدع شراً إلا ونهانا عنه

.
.
.
.